6 أبريل، عصيان مدني في مصر

بسم الله
السلام عليكم ورحمة الله وبركاته


تم نشر الخبر التالي والمتعلق بموضوع الإضراب العام أو العصيان المدني في مصر على موقع قناة العربية الإلكتروني.
بعنوان:
"احتجاجا على غلاء المعيشة
قلق بمصر بسبب انتشار دعوة "لعصيان مدني".. وتحذير من العواقب"
http://www.alarabiya.net/articles/2008/04/05/47894.html

وطبعا الخبر يشمل تهديدات الحكومة بالتصدي لأي شخص تسول له نفسه، إنه يفسد النظام.
بس أظن لو سولت له نفسه اللي هي مشتقة من تسول، يعني شحاتة....الحكومة مش هتعمل له حاجة.


أنا بصراحة أول ما سمعت الخبر من فترة لم أصدق، خصوصا كون تاريخ الحدث ارتبط بشهر أبريل، فقلت ده أكيد كذبة أبريل.
وخصوصا بعد ما واحد زميلنا بعت لنا موضوع، إن الشجر طرح مكرونة اسباجتي، وطلعت كذبة أبريل، ومش بعيد السنة الجاية يقولك الحقوا علب الصلصة على الشجر.


طيب ليه بقي يستحيل إن المصريين يقوموا بإضراب؟ لأن المواطن المصري معروف تاريخيا إنه أول من عبد الحاكم بتاعه.
والحاكم قال أنا إله، قالوا له وماله يا باشا....إله إله، ما يضرش، ويحيي الظلم.
لكن التاريخ يشهد أيضا، أن المحلة الكبري، رفضت هذا الأمر منذ فجر التاريخ، وتلقبوا بلقب الفلاحين، وحصلوا على الدوري في السبعينات من أنياب الأهلي والفريق اللي ما حدش فاكرة، اللي هو القطب التاني اللي مش مشحون علطول.
ومن المعروف أن منسوجات المحلة غزت العالم "من الغزو"، وفي الحالة دي تبقي المحلة غزت الحكومة "بالمطواة".
محلات غزل المحلة، زورونا تجدوا ما يسركم، والفوطة بجنية ونص، وياله ياله ياله يا جدعان.


لكن هل الموضوع هيكون عبارة عن يوم تنفس فيه الجماهير عن غضبها؟ ولا هيكون يوم هيقف عنده التاريخ؟
"ده طبعا، إذا كان التاريخ بيعدي على كوبري ستة أكتوبر، فأكيد هيقف في الحالة دي"

وهل هنغني، والله وعملوها الرجالة ، ونضفوا مصر بلدنا؟ وقعدوا في بيوتهم قعدة رجالة، مبروك لمصر وأولادنا؟


عموما هنشوف، وهنيالك يا فاعل الخير والإضراب
بس السؤال اللي بيطرح نفسه بقي....
و زي ما أنتوا عارفين، أي سؤال بيطرح نفسه بيساوي صفر

- هل المباراة القادمة للنادي الأهلي ستشهد هذا الإضراب المدني العظيم؟؟؟
وطبعا مش محتاجين نسأل، هل الناس هتعمل إضراب عن الذهاب للمساجد ولا لا؟ لأن المضربين عن الموضوع ده ما تعدش....إلا من رحم ربي


ومن قدم إضراب بيداه التقاه، في أمن الدولة
وهيعلموا فيه إيه هناك يا عم الحاج؟
ده سؤال بيطرح نفسه = صفر


وصلي اللهم على سيدنا محمد وأله وصحبه وسلم